西甲 柴崎岳超級窩利!巴塞僅勝折大將

作者:Diana    發表日期:2017-09-17 06:02:01

即上英超刨績王:http://win.on.cc/epl 

邊個估到弗爆巴塞,對住升班球隊會被迫到死角?西甲開咧3場全勝嘅「地上最強」,今輪聯賽作客基達菲,上半場末段意外落後,有「真人戴志偉」之稱嘅柴崎岳,禁區外球不着地、左腳勁抽窩利直飛遠柱,可謂金球中嘅金球!但呢位日本國腳其後受傷被換離場,巴塞終靠保連奴完場前入波反勝,雖然攞足3分,但講搶鏡,無論係美斯,蘇亞雷斯抑或保連奴,都唔及柴崎岳!

柴崎岳今年25歲,司職進攻中場,舊年底於世冠盃一戰成名。當時佢效力鹿島鹿角,於四強大戰皇馬,呢位天才10號仔先於禁區內入波,之後更於幾名皇馬球員包圍下,禁區外抽射地波再度轟破銀河艦隊大門,於90分鐘內迫和皇馬,雖然最後於加時輸波被淘汰,但無論係鹿角定柴崎岳,都已令人留下深刻印象。

其後佢加盟西乙特內里費,以優秀表現帶領球隊殺入升班附加賽,可惜輸畀基達菲未能升班。不過基達菲於今夏買入柴崎岳,令佢一償征戰西甲心願。呢名曾11次代表國家隊嘅好波之人,於大賽踢得特別醒神,今仗所入一球簡直妙到毫巔,基達菲領先上半場非常合理。

巴塞今仗踢得好辛苦,而且於29分鐘,天價新將奧士文尼迪比利更拉傷大腿要換出場,賽後證實大腿有撕裂現象,要抖4周。基達菲隨後亦有柴崎岳傷出,巴塞於苦戰下,憑2名後備丹尼斯蘇亞雷斯,以及保連奴各建一功,驚濤駭浪下反勝對手,完成聯賽歐聯5連勝續排榜首;基達菲雖然輸波而回,但整體表現唔曳,如果柴崎岳續有優異演出,相信會不斷畀到球迷驚喜。

東網體育同你追實體壇每個精彩時刻! 
http://bit.ly/2ecTF2A 


本文來源:http://hk.on.cc/hk/bkn/cnt/sport/20170917/bkn-20170917042423749-0917_00882_001.html




Tag:
本文鏈接:http://www.ecshopsite.com/26969.html