世盃外 搞掂!日本Book機票去俄羅斯

作者:Gloria    發表日期:2017-09-03 19:46:02

即上英超刨績王:http://win.on.cc/epl 

周四(31日)晚舉行嘅世盃外亞洲區第3圈B組賽事,日本憑淺野拓磨及井手口陽介上、下半場各入1粒,主場以2比0擊敗澳洲,成為繼巴西、伊朗之後,第3支透過外圍賽取得明年決賽周入場券嘅球隊。

日本今仗正選收起香川真司、本田圭佑或岡崎慎司等大牌球星,長谷部誠以隊長身份喺中場領軍,前線則由淺野拓磨、乾貴士夥拍大迫勇也攻堅,顯然希望用一批跑得嘅球員彌補體形嘅不足,澳洲亦缺少喺英超搵食嘅中場阿倫穆爾,老將卡希爾則打後備。

排433陣式嘅日本初段積極爭取主動,但澳洲憑體力及身型抗衡,彼此拉成均勢,去到上半場末段,大家開始搏拳。37分鐘,澳洲馬菲歷基遠射省中日本守衞改變方向中柱,大難不死嘅日本之後靠淺野拓磨接應長友佑都嘅左路過頭波,突破越位無人看管下門前建功,助日本半場領先1比0。

下半場澳洲全力反撲,並先後換入杜米祖歷、卡希爾求收復失地;71分鐘,羅比古斯右路傳中,杜米祖歷來遲一步,錯失扳平機會,之後日本一次反擊,井手口陽介射門被澳洲後衞護空門解圍,不過呢名啱啱度過21歲生日、畀日本傳媒形容為秘密兵器嘅大阪飛腳中場,喺完場前8分鐘禁區邊起腳遠射終於有收穫,為日本奠定2比0勝果完場。賽後井手口陽介不但喺日本媒體嘅評分,以7.5分居全隊之首,仲當選埋今場最佳球員。

除東道主俄羅斯自動入圍,現時已有巴西、伊朗及日本憑外圍賽取得決賽周席位。澳洲輸波後與沙特阿拉伯同得16分,但澳洲得失球較差排小組第3位,澳洲最後一輪會喺下周二晚主場鬥泰國,沙特阿拉伯則於主場迎戰日本。


東網體育同你追實體壇每個精彩時刻!
http://bit.ly/2ecTF2A 


本文来源:http://hk.on.cc/hk/bkn/cnt/sport/20170831/bkn-20170831203224997-0831_00882_001.html




Tag:
本文鏈接:http://www.ecshopsite.com/25120.html