利市直擊 遊晏菲路 行勻新版主看台

作者:April    發表日期:2017-06-03 04:34:01

自從芬威體育集團(FSG)收購利物浦,好多球會事務都向大有躍進,除咗早排拍板擴建新訓練場,晏菲路球場嘅擴建工程亦都繼續進行,今季初完成擴建並啟用嘅主看台,令球場可容納人數一下子增加至超過5萬4千,小記嚟到利物浦,梗係要去參觀下喇!

記者喺周六(5月20日)跟住「渣打5人足球賽」嘅大軍,遊覽球場,記得上一次嚟係2011年,今次再見球場,比起嗰陣更加宏偉同現代化。負責導賞嘅先生帶住我哋步入主看台大樓,首先經過最高級、每人每季盛惠至少10,400英鎊先可以用嘅行政酒廊,不過提供嘅座位視野非常好,賽前仲可以喺酒廊享用高級美酒佳餚添。之後再出去新嘅觀眾席望下,坐椅全部都好新淨,居高臨下睇波,視野一流。不過記者都係獨愛死忠球迷集中地、最熱血嘅KOP。

另一樣不得不提嘅係,依家利物浦博物館有為謝拉特而設嘅專門展覽Steven Gerrard Collection,入面擺滿「神奇隊長」歷嚟收集過嘅波衫同埋贏得嘅獎牌,其中最搶眼,肯定係2005年歐聯決賽「伊斯坦堡之夜」嘅波衫同冠軍獎牌。謝拉特一生或者未贏過英超冠軍,但呢位「神奇隊長」轉任青年軍教練作育英材,希望佢有一日可以用第2種方式,幫紅軍重返巔峰。


本文來源:http://hk.on.cc/hk/bkn/cnt/sport/20170521/bkn-20170521082117250-0521_00882_001.html




Tag:
本文鏈接:http://www.ecshopsite.com/11626.html